Det er politisk vedteke at alle vidaregåande skular i Møre og Romsdal skal gjennomføre ei undervisningsevaluering kvart skuleår. Målet med evalueringa er å vere eit verktøy for kvalitetsutvikling i den vidaregåande opplæringa i fylket. Resultata skal nyttast i utviklingsarbeid både mellom lærar og undervisningsgrupper, og mellom lærar og avdelingsleiar.
Rambøll Management Consulting bistår fylkeskommunen med design, gjennomføring og rapportering av evalueringa.
Korleis blir evalueringa gjennomført?
Evalueringa skjer som ei elektronisk spørjeundersøking som elevane svarar på i skuletida. Det er frivillig å delta, men vi oppmodar alle elevar til å svare.
Svar blir behandla konfidensielt, og ingen enkeltpersonar kan identifiserast. Rapportar blir berre utarbeidde for grupper med fem eller fleire svar.
Kven skal evaluere?
Elevane skal evaluere undervisninga til lærarane sine. Den enkelte elev kan bli bedt om å svare éin eller fleire gongar, avhengig av kor mange undervisningsgrupper som er valde ut. Nokre elevar vil ikkje få evaluering i det heile. Det er skuleleiinga som avgjer kva grupper som skal delta.
Om spørjeskjemaet
Spørsmåla er dei same for alle fag og undervisningsgrupper. Skjemaet er utvikla i samarbeid mellom Rambøll og Møre og Romsdal fylkeskommune, og inneheld spørsmål fordelt på fire tema:
- Eleven si meistring og motivasjon
- Vurderingspraksis
- Støtte frå lærar
- Læringsmiljøet i gruppa
Har de spørsmål til undersøkinga, kontakt Møre og Romsdal fylkeskommune ved rådgjevar Ann-Christin Hoel Lervik (ann-christin.hoel.lervik@mrfylke.no), eller rådgjevar Lindis Huse (lindis.huse@mrfylke.no).